Panaliten iki duwe ancas kanggo njlentrehake aspek ekologi sastra kang kaandhut sajrone tradhisi upacara adat Temu Tirta ing Desa Samiran, Kecamatan Selo, Kabupaten Boyolali. Panaliten iki nggunakake teori ekologi sastra saka Endraswara (2016 kaca 89) kanggo nganalis sesambungan watarane manungsa, alam, lan budaya ing tengah masarakat. Panaliten iki duwe ancas kanggo ngandharake (1) aspek ekologi sastra sajrone tradhisi upacara adat Temu Tirta ing Desa Samiran, (2) piwulang pendhidhikan karakter kang kamot ing sajrone tradhisi upacara adat Temu Tirta, lan (3) relevansi minangka materi ajar ing SMP. Panaliten iki migunakake metodhe deskriptif kualitatif, kanthi tatacara nganalisis dhata model Spredly (2021). Sumber dhata panaliten yaiku, dokumen, kadadeyan budaya, lan informan. Dhata panaliten awujud ukara, prilaku masarakat, lan asil wawanrembug. Tatacara njupuk subjek panaliten migunakake metodhe purposive sampling. Tatacara nglumpukake dhata ana analisis dokumen, observasi, lan wawanrembug. Ngesahake dhata migunakake triangulasi teori lan triangulasi sumber dhata. Asil panaliten tradhisi Temu Tirta nuduhake ana 23 dhata aspek ekologi sastra sajrone gugon tuhon, mantra, lan prilaku budaya, ngandhut 4 nilai pendhidhikan karakter kayata, relligius, peduli lingkungan, lan nilai kreatif. Sakliyane kuwi asil panaliten ekologi sastra lan nilai pendhidhikan karakter bisa digayutake tumrap materi ajar pasinaon Basa Jawa ing SMP mligine ing kelas 8 ing materi Teks Dheskripsi.

Tembung wos: Ekologi Sastra, Pendhidikan Karakter, Tradhisi, Upacara Adat, Materi ajar.